論「孤寒」同「度縮」，印度人同猶太人必定係世界之冠，去過美國讀書嘅小弟最清楚。好記得有幾位印度同學仔，每次去麥當奴都會攞好多包茄汁，一返到房，即刻逐包逐包咁唧返落樽茄汁度 …… 最令人歎為觀止嘅係，支茄汁其實都係飯堂偷返嚟嘅！
有條猶太仔仲犀利，成日話唔識功課，借啲意嚟我間房一齊溫書。每次溫親書都會話肚餓 、口渴，前前後後都唔知食咗我幾多個杯麵 、叮飯，慳咗唔知幾多餐。都唔緊要，最無攞命係次次順便問嚇我有冇嘢唔要，畀完佢，原來轉個頭賣返畀其他同學。
點解我會知？因為有次同佢買本教科書，一打開，僕你個街，上面大大隻字寫住「Shun Nakamura」，原來又有位日本同學仔被騙了。
我一直覺得，呢兩個民族啲數口已經精到無得再精，直到我遇到 Captain Koo 。
Captain Koo 並非一位機師，相貌亦絕對同張智霖扯唔上任何關係，之不過係佢度縮到一個位，大家都開始叫佢「孤鳩寒」，Captain Koo 呢個綽號亦因而誕生。
Captain Koo 祖籍上海，一路都聽聞過上海仔啲數辣，不過未正式交過手；直到喺 Captain 身上，我先肯定上海人嘅實力。
Captain 大小事都計到盡，試過同女朋友去旅行，要用 Excel 記低每樣買過嘅嘢，連一杯雪糕嘅點數位都要計！又試過同女朋友交換聖誕禮物，點知發現自己嗰份貴$200，走去問人攞返$100。
不過，最厲害一定要數佢點識佢老婆。
話說 Captain 家住舊山頂道帝景園，而屋企人一早亦都買咗間曉峰閣畀佢，等佢第時結婚用。不過，半山車位要成五球嘢一個，佢知道如果第時要搬，就一定要租多個車位，大約三千幾，呢啲「小數目」對於 Captain 嚟講簡直心如刀割！於是乎，佢諗到一條計：就係每個週末夜晚，喺曉峰閣大堂等啲醉貓返屋企。
憑住扮鄰居，最終 Captain 媾到幾條女，不過先後因為原來只係租客 、屋企無多餘車位而分手收場。最後，佢終於認識到一位美女叫 Alice ，獨居，自有物業，仲要有個無人用嘅車位。好快，兩個人就去到談婚論嫁地步，Captain 竟敢大膽提出結婚後住喺女仔度，甚至連自己喺曉峰閣有個單位都無講！個女仔又居然無所謂，仲唔使佢交租㖭！
原本只不過係為咗慳車位租，而媾同大廈住客，最尾竟然演變成自己層樓有得放租之餘，仲有層同級免費豪宅連車位！啲數咁辣，唔知會唔會叫老婆做埋賓妹呢？
自從 Captain 同 Alice 結咗婚，我再唔敢同上海人有任何錢銀瓜葛。
- END -