好多人會有一種錯覺以為十年前係1997年，其實已經係2007年，而嗰年開始，我返學再都唔可以「飛摩」了。
其實屋企嚟學校唔算遠，但係行路都有一定距離。大概小學開始就養成咗遲到嘅壞習慣，所以「飛摩」就變成咗當年返學嘅首選交通工具。而且已經同附近嘅摩托佬達成共識，兩蚊成交咗行路需要二十分鐘嘅路程，每日早上上演《速度與激情》，用最快嘅速度，喺打鐘前飛摩去到學校門口，咁就唔洗比門口啲值日生捉住喇。記得當時每日有五蚊零用錢， 兩蚊搭摩托車，三蚊買零食，其實都幾幸福。
但係2007年1月1日開始，廣州全面禁摩。一夜之間，無數以載客為生的摩托司機失去飯碗；無數摩托車迷再都唔可以凌晨喺路上飛馳；26萬輛摩托車報廢或遷移...
記得嗰一年小學六年級，屋企小區門口無曬摩托車，曾經搭開嗰個摩托司機都無再見過，感覺成個城市安靜曬。但係從嗰時開始，我又變成咗遲到大王。當時嗰個年紀根本唔會考慮太多，甚至返學放學仲會同同學仔抱怨，無咗摩托車，真係好唔方便...
前幾日，各大公眾號頭條，新聞頭版都流出「廣州疑似取消禁摩」嘅消息。但係當睇到呢個消息嘅時候，細個曾經日日搭摩托車返學，曾經抱怨點解禁摩嘅我，竟然第一反應係：“有無搞錯啊，廣州有摩托車仲得了嘅！”
不過好快官方就出嚟闢謠，並非取消禁摩，而係決定喺廣州不再全面禁售，而且特定時間劃定區域可以通行摩托車！3月29日上午，《廣州市非機動車和摩托車管理規定》在廣州市十五屆人大常委會第三次會議上表決通過。
呢次規定，放寬咗對摩托車禁行的限制。未在廣州註冊登記的摩托車，特定時間喺劃定區域可以過境通行。而具體時間和區域會喺接下來時間公告。另一個較大嘅改變就係，由原來的「廣州任何單位和個人不得銷售電動自行車、摩托車」，變成「禁止生產、銷售不符合國家標準的非機動車以及未列入國家《道路機動車輛生產企業及產品公告》的摩托車」，所以只要係合法規的摩托車就唔禁售。
當然，仲有一啲小改變，例如「闖禁行區罰200元，但不扣車」等等。
大大話話十年過去， 廣州作為最嚴禁摩城市，居然放寬摩托車禁止上路限制。難道喺未來，真係會逐步實現取消禁摩？要知道廣州從摩托車盛行到全面禁摩用咗接近15年時間▼
■ 1991年10月起，廣州市區摩托車限 量發牌，每月500副
■ 1995年起，市區不準新的摩托車入戶，只能報廢更新和一次套牌
■ 1998年3月，全面停止核發市區(舊8區)摩托車號牌
■ 1999年起，市區全天24小時禁止番禺、花都、從化、增城4地摩托車進入
■ 2001年12月，登記上牌滿15年的摩托車一律報廢
■ 2002年1月，摩托車報廢年限縮短為10年;
■ 2002年5月起，內環路、二沙島、流花地區、人民路實施全天候24小時禁止摩托車行駛
■ 2003年11月，計劃分路段、分區域、分階段逐步實施限制摩托車行駛
■ 2004年5月1日起，東風路、解放路、環市路等一批重點路段每天9時至16時30分、20時30分至次日5時禁行摩托;
■ 2006年1月1日起，東風路全天禁摩
■ 2007年1月1日起，廣州全面禁摩
雖然用咗15年，但係喺2007年正式全面禁止後，卻仲係激起大量民憤。其實07年之前，廣州摩托分市區牌和郊區牌，市區摩托其實唔會比汽車多，因為公交發達，坐公交嘅人多，摩托車都好守法。郊區牌唔可以入市區，而且摩托車基本都係正規廠家嘅好車，甚少無牌無證敢上路嘅摩托車，因為後果很嚴重。但係，自從全面禁摩後市區的確無摩托，但係周圍都係電瓶車，橫衝直撞，經常出現交通事故。郊區嘅摩托都翻咗十倍，全部都係無牌無證嘅山寨車...
而且好多人都覺得，07年後數十萬部摩托車喺廣州慢慢消失，然而卻並沒有改善廣州擁堵嘅交通狀況。反而廣州禁摩之後，越來越塞車。更有一個公認嘅觀點，禁摩嘅城市基本都塞成狗！比如杭州，擁堵排名全國第三！
如果廣州取消禁摩...
但係如果話，廣州要用翻15年時間取消禁摩，我諗我應該唔會贊成！望住如今嘅廣州，已經想象唔到如果摩托車重新出現喺大街小巷會係點樣一個混亂嘅場面...
本來近一兩年，廣州街頭已經多咗大量共享單車，唔知大家有無發現，呢家過紅綠燈，可能旁邊踩單車嘅人仲多過行路嘅人。甚至仲逆行，踩上人行道，呢家出街已經唔係擔心比汽車撞，而係比單車撞。已經好幾次喺落公交車嘅時候，比後邊突然衝出嚟嘅單車撞親。如果摩托車再重新上路，廣州街頭就充斥住各種私家車、公共汽車、網約車、共享單車、電瓶車、摩托車、殘疾車，仲有啲咩平行車、滑板車....諗到個場面都有啲驚！
記得細個嘅時候，因為屋企樓下就係當年廣州好出名嘅燈光夜市。晚上一個人跑落街玩，因為路兩邊都係攤位，人又多，一部迎摩托車擦身而過，車頭嘅倒後鏡迎面撞落顴骨，成塊面腫曬，去醫院照片發現顴骨裂咗...（呢家塊面咁大絕對係呢次意外造成嘅！哼！）除咗呢次意外仲有N多次因為摩托車而受傷，例如坐摩托車後座時被煙囪辣親腳，相信好多人都試過！
摩托車喺廣州人口中，一直都有一個代名詞—皮包鐵。速度快，無安全保護設施，只要一炒車，駕駛人基本就撲街了...曾經有外科急診科醫生表示，喺07年前日常診療中所見嘅摩托車交通事故比一般交通事故要大得多。所在醫院每月嘅“120”出診工作中約有1/3到1/2為交通事故，其中由摩托車造成嘅事故約佔六成左右。另外，摩托車一旦發生交通事故，傷情遠比其他交通事故嚴重，重則甚至當場死亡。
而且廣州當年決定禁摩嘅最重要原因就係—飛車黨搶劫。
當年廣州市區開摩托車搶劫真係好猖狂。特別白雲區等地方，聽講當年只要喺柯子嶺附近工作、生活嘅人，基本都有被飛車黨搶過嘅經歷，搶手機、搶包包、甚至搶帶喺頸上嘅金鍊...有啲係先搶完再上摩托車走，有啲甚至係同黨開車自己坐喺後座，慢速經過直接搶完加速開走，如果被搶劫者唔放手，甚至用摩托車拖住你行，超級猖狂！後來全面禁摩，可能都加大咗整治力度，治安確實好咗好多。
如果取消禁摩，面對住橫行無忌嘅摩托車，有關部門又唔能夠加強管理，相信飛車搶劫案將會再次發生。
當年禁摩引起爭議嘅另一原因，就係公交線網未夠完善，地鐵覆蓋未夠全面，摩托車能夠大大提高出行便利。但按目前廣州公共交通發展情況嚟講，地鐵運營中嘅線路已達10條，覆蓋站點越來越全面，摩托車作為交通工具嘅便利性已不高，如果廣州取消禁摩，只會增加路面交通承載量，令到廣州交通越來越亂。
十年過去，我諗好多人都已經接受咗一個無摩托車嘅廣州。
如果廣州喺未來真係取消禁摩，你會同意嗎？
閱讀更多 阿超品機車 的文章
