溫馨提示：
本故事並非鼓吹賭博
勸喻各位切勿沉迷賭博
今日才叔與幾位昨夜未到靈堂的莊荷同事聊天時，大家都有問起離世員工的未亡人情況。
「明哥家人的生活唔知點呢？」
聽到同事的問題，才叔便講出昨晚在靈堂瞭解到的情況，
原來阿明近年剛申請咗妻子同孩子從內地來到澳門，佢入職莊荷時間不長，薪水唔高，為咗改善老婆同孩子的生活，放工之後，有時仲會兼職的士司機，
「譁，使唔使咁摶呀？」有同事說，
「無辦法啦，明嫂話，而家物價貴，又要租屋、又要負擔細路既供書教學費用，阿明當然要搏啲啦，」才叔解釋道，
呢個時候，張Sir同阿達啱啱收工，就一齊加入大家吹水行例，
「咁又係，才叔你果時在新公司做荷，每月收入萬幾蚊，但係果時樓價平，租金又唔貴，物價又穏定，生活當然唔成問題，」新移民的阿達，首先搭嘴，
「呀係，我哋細佬仔既時候，澳門街做荷官曾經是本地人眼裡十分『吃香』既職業，一人在新公司打工，全家衣食無憂架，」張Sir呢個時候，亦插口說，
才叔聽得二人說話，語重心長咁道來：
「哎！我地後生果陣，講起都五十年囉，澳門經濟不景，人浮於事，搵份工打都唔容易，行業不多，搵份印刷、造船、泥水、油漆、『竇』木既學徒工都好難，好彩我經得細叔人既事關係，入到新公司，先至由酙茶遞水做起，捱咗成年幾，先至能可以響賭枱旁企，由最低層做起，講起來，當時仲要使咗一千蚊『茶錢』，先至有工做，」才叔講到當年入行事，都幾感概，接著又講，
「唔好以為企到賭枱邊，是一件輕鬆的事，從侍應生到能上訓練場，要大約兩年時間。還要學九五數和手門、再考試出場。當時計日薪有上班就有錢，每日基本工資是10元，小費佔了總收入的九成。」
「係呀，我隔離屋既阿叔，當時想使人俾茶錢，都入唔倒嚟做，最後響賭權開放後，莊荷人手缺乏時，先入到新口岸果間新場做。我中學畢業後，都係響果時考入去做荷，先至有份工做咋，」張Sir對才叔的講法，深有同感，
「係呀，近年本地博彩業幾經波折，今日終算有咗一啲好轉的跡象，但老闆又點會和我地啲打工仔同甘共苦吖，啲荷官又有點樣好既待遇呢？」書生阿達接著講，
「莊荷無以前咁搶手了，除了辛苦外，就係已經無咗以前果的優勢，」
「上個世紀賭權未開放時，可以進入賭場工作是件有面子既事。崗位搶手，想入行都唔易。在十多年前的澳門，又有什麼工作能和荷官相提並論？」
「有咩辦法，賭權開放，賭牌一變三，三變六，賭場遍地開花。2004年博彩業員工有19,772名，月薪10,881元；2017年博彩業共有56,634名全職僱員，平均薪酬為22,940澳門元。但係而家一的經驗莊荷月薪可達18,000元左右，今日新入行既BB荷，有啲只能收15,000至16,000咋。雖然近十年本地博彩業高速增長，但係市民既收入增長緩慢，樓價仲比十年升超過十倍。」資深既才叔一番話，講出近年莊荷苦處。
「所以，你哋好應該珍惜眼前呢份工呀。可惜而家入來的新同事，落班唔好好休息，仲一日到黑到處『蒲』，搞到上班『烏眉洽睡』咁，成日瞓未醒，身子搞壞唔使講，仲好易做野時出錯！」
「才叔，沒法子啦，誰叫我沒有『書生』咁樣，生活正常，多姿多彩，還是『文藝青年』，真不明白：『史前動物』的書生，點會成為貴賓廳的『金牌荷官』，」呢個時候，有人「委屈」地向才叔和張Sir反駁，
「我們上一輩的菠菜從業員，工餘文體康樂活動不少，響工會同工友的安排下，特別是各種球類交流、比賽，令大家生活在『大染缸』都正常一點，真係『出淤泥而不染』架。今日賭牌多咗，從業員亦比以前多，而且固定工資都比其他行業要高，但要維繫工友們以前果種情誼，實在不易，時代變了，……，」作為資深從業員，P.M.經理身份的才叔，又係一陣感概，
「鹹魚青菜，各有所愛，賭場九反之地，如果唔潔身自愛，邊個受罪？有事又有邊個可以幫你？」被稱「書生」既阿達，一派老氣橫秋語氣，
陳志達，原係內地出生既「超齡子女」新移民，阿達在內地福建省大學電子系畢業，來到澳門，專業學歷不被承認，為供養年邁母親，幾度考核面試後，成為莊荷。因文化程度比同事高，被稱為「書生」，也有俾咗個名為：才子。
一位女同事，見到大家七嘴八舌，閒話賭場生活，佢都加入吹水人群：
「而家賭業女多男少，尤其係我地女性荷官居多，講到同工同酬，而家既高薪酬職位男性總系著數啲，所以做荷官難，做女荷官更難！」
「係既，女性要照顧家庭、又要生兒育女，加上工作三班倒，好多入咗呢行，家庭就會受到影響，婚姻問題特別多，一係大齡未嫁，又或者離婚收場，現時夫妻二人同在賭場打工的例子唔少，但問題亦多，」才叔以過來人，資深慱彩員工身份，講出行業其中一個社會問題。
「其實，琴晚明嫂家庭就是一個明顯例子，明哥係家庭支柱，一朝去世，家中留下孤兒寡母，你話幾淒涼？」書生阿達想到母親含莘茹苦咁養大佢成人，一時感嘆，有感而言，
「係呀，阿明生前同我地都係一場好朋友，我哋都要想法子，幫下佢既家庭啦，」才叔開始為明嫂同孩子，與一班同事商量日後如何開解、幫助未亡人。
「才叔講得啱，明哥生前以為自己身體無咩野，總顧住忙住生活，無想到一日發生意外，老婆仔女便失去保障，」張Sir也說，
「係，我地生活之餘，也要想想日後的保障，好似阿明咁，除咗攞番公司的公積金外，當時醫病都使咗一大筆錢，而家都所剩無幾啦，」才叔聽得張Sir既話，接著又講：
「而家唔少同事，在眼前有公司保障既同時，都會買番一份保險，以防意外架，」
「才叔，有錢都及時行樂，玩下先啦！」一個年青莊荷插嘴，
才叔一時間真的無語：無話可講！
閱讀更多 細譚闖江湖 的文章
