溫馨提示：
本故事並非鼓吹賭博
勸喻各位切勿沉迷賭博
（一）賭場男莊荷變身強盜，劫走半億籌碼！轟動全城！
（二）莊荷難，女莊荷更難！澳門荷官閒話賭場生活
清晨時分，剛下班的明嫂，成身疲累，急步走過皇朝區，正想趕早班巴士返屋企。事因琴晚返工前，個仔已經叮囑話：今日早上要返學校，班主任有事要商談，呢啲就係個仔講「見家長」。
一路行，明嫂一路想。自從丈夫開始準備申請母子二人來澳門時，便一直根據自己的學識水平，不斷督促細佬仔學業，從無偷懶。自從來咗澳門，特別係丈夫阿明過身之後，對小健的功課，只有加大力度，生怕佢學業跟唔上，都算託福，孩子功課一直居班中既上游位置。
但今次要「見家長」？真諗唔到因由。
自己由才叔介紹做莊荷，為改善一下家中經濟狀況。難道係最近二個月的事？
也就是阿明下葬，做完「三七」後，才叔帶住幾位阿明生前既好同事，來到家中探訪，
「明嫂，阿明後事都七七八八吧，仲有咩睇下要我哋同事幫手，」才叔首先問，
「真係多謝曬你地幫手，‥‥‥，但係，‥‥‥；」明嫂有啲為難咁講，
「明嫂，唔使客氣既，明哥生前都好『睇』我哋，大家當作家人咁相處架，」張Sir附和才叔咁話，
「哎，阿明留低俾我啲錢唔多，開講有話：長貧難顧。我都要想下法子，搵番份工打，如果唔係，我地母子兩人遲早坐食山空啦！」
「咁又係，有份工就實際的，‥‥‥，」才叔邊講邊諗，
「但係，我文化水平唔高，先初中畢業，而家搵份手作工，都只係七、八千蚊，點夠家庭開支吖？」
「不如考莊荷啦，反正而家缺人，」阿達提議，
「薪水雖然高啲，但係要捱更抵夜噃，」，張Sir也有的顧慮咁話，
「無咩行頭可以入職就有萬幾蚊喎，我都讚成阿達既提議，辛苦啲都要囉，」
就係咁，明嫂就開始咗考入莊荷員工行列。
想起入職、培訓過程，明嫂至今印象猶新：
果日係明嫂第一日參加培訓課程。上堂導師做咗自我介紹後，就開始做示範操作。
只見導師張Sir兩手摞著一盒撲克牌，上下咁疊牌操作，明嫂後來知道，呢的操作就叫「洗牌」，接著先生轉用右手摞住紙牌，在綠色絨布面，由左向右咁，以弧形路線先向外推，跟著回手內拉；轉眼間，一疊紙牌就刻咁做成扇面形狀排開，學員睇到紙牌背面的圖案，好似一彎花月咁，真係目定口呆。跟住見導師用一張紙牌，由紙版尾部，用右手食指一挑一抖，看時遲、變時快，每片紙牌由尾部逆向「翻身」，現出正面點數和花式圖案，瞬眼間，睇嚟似一條同色的「紙牌」長龍，立刻變為「色彩繽紛」的「花龍」，學員們又再張開大嘴，眾人喉嚨像好似被一啲東西堵住，一時間靜咗落嚟，無法開聲。
「你哋識唔識呀？」導師收起啤牌，摞響手裡面問同學，
「……，」學員們全部搖頭，
「好難嘛？」
「難，……，」大家攝攝地交投接耳，
「呢啲係無用既，」張先生笑笑口跟著講，
「我唔係培訓你哋玩魔術、雜技，我要求你哋完成課程後，經考試或響正式上場時，不能夠派錯牌，牢記住規則，兌碼要正確，殺注唔出錯，賠碼要準確，仲要計數快而準、清楚。知道無？」
「……，」今次各個學員，不停咁點頭。
「你哋今次的培訓重點項目係『百家樂』，在課程完結，考試合格後，將會有三個月既試用期，期滿成為正式員工，將來仲會有更多機會接受其他摶彩項目的培訓，好似：『骰寶』、『廿一點』、『三寶』、『加勒比海撲克』、『花旗骰』」等等，學會一個項目，公司就會向學員發出一張『證書或者牌照』，」
開場白過後，導師張Sir向各人派發一啲上堂注意事項同埋課程講義。明嫂睇著手上既紙張：好多年無咗上堂的體驗，今次自己諗下，真係有啲壓力。
「大家睇睇第三張講義，」張Sir接著講，
「呢張係講今堂培訓項目既十二部曲：」
大家看到上面寫住張Sir講的話：
「請投注；
幾號閒（紅色）、幾號莊（黃色）；
截止投注；
派牌：閒莊、閒莊；
閒睇牌，莊睇牌；
閒幾點，有無對；莊幾點，有無對；
閒（莊）搏牌；
定輸 / 贏【以下是五部曲】；
閒贏，收莊幾份：莊贏，收閒幾份 收 / 賠；
（檢查）有無「漏收牌」；
反「豬油膏」、關燈；
「請投注」；
張Sir停咗一下，跟住講，「除了上面既十二部曲外，大家仲要記得，「襟制」：即係向客人公佈今次牌局勝負既『著』燈按鈕；所謂：望『芒』，便指大家眼前的熒光幕（monitor）；所有程序做足後，就開始向投注『中彩』的客人派發賠款，呢啲就係『派彩』，」
張Sir將手上一塊兩邊各註明「莊贏」、「閒贏」兩字既方形厚骨牌舉了一下，接著話，
「所謂收『豬油膏』，就係將頭先呢這塊放係枱前的『莊贏或閒贏』指示俗稱『豬油膏』既骨牌收番，先至可以俾客人重新投注，咁可以避免不必要爭吵。這些手勢或叫手法，我哋行內叫『手門』，大家培訓結束時既考試，其中一項就係要『手門』清晰，唔可以模稜兩可。明白未？」
培訓班第一天下課，明嫂全身散咗架，頭昏腦脹咁，急步走過皇朝區，趕著回家，一改平日的生活習慣，今天家中沒燒菜造飯。
個仔小健捧著飯盒，在一邊睇住母親在將日間的培訓程序複習，又或準備下一日的測驗練習，佢唔明母親跟勤力咁，要求自己望完講義內容後，要快、準、清（楚）
明嫂睇住講義文字，同時回憶或相像實際操作：
「背數快；
套單位要準、快；
執碼、曬碼、清；
兩位數不用報原注碼，直接計數；
三位數出完即報出尾數；
邊曬（碼）邊報（數）；
三位數的串洞數，對子串洞數都可直接套單位；
過萬要叫P.S.，叫完即上碼，不要等；
不要計兩次；」
又一段講義的內容：
「公司閒，座位莊；
公司莊，座位閒；
企位莊，座位莊；
企位閒，座位莊；」
第二日上課不久，因前夜無睡太多，實在眼困，開始打哈欠，耳邊響起導師既聲音：
「串窿」數直接套單位（對子、莊數），12派132（中間加1，尾數不變）、110派1210（數字中間加1，尾數0不變），九五數11500派111045‥‥‥，」
數日地獄式「口訣」訓練，又經過一連串密集式的心算訓練，包括一天上、下午，一星期每日既測試，導師務求大家在考核時，或日後在枱面操作上，有一個紮實的根基。
今日又是一陣頭昏腦脹要記憶的「手門」；
一位數萬千位，支水錢
百位橙夠收，藍要齊
兩位數千百位，淨尾水
橙夠收，藍要齊
劏魚（整條投注條數額）減前面的水
頭尾水：一、先做尾，成條數減完前面的水，再「望」出邊；三位數淨頭水，背數，套收益再加；淨收藍橙，劏魚減前面的水，‥‥‥，
下課小息時，明嫂問身邊既學員，究竟聽得明白無？雖然對方吱唔以對，但年青人，記憶力相信較自己為好，這樣，自己的壓力又增加咗。
一連兩個星期，明嫂每晚回家都沒煮飯燒菜。自己加班加點咁自我練習、演練、預習，好應付第二日既測試。為期二個星期既培訓班，轉眼就過去咗，家中收入增加咗，從無收入至到月入萬五，心中有點「安穏」感覺，俗語有話：錢係人膽嘛。
今日小健學校班主任「見家長」，心中預感，一定同自己工作有關，但係真正原因又係咩呢？
閱讀更多 細譚闖江湖 的文章
