「Sorry，有錢真系大曬，不過我諗佢唔會明呢個意境。」這句在TVB劇集《讀心神探》第17集裡面的對白，原來不止香港觀眾，連內地網民對這句對白一點都不陌生。最近大陸一間遊戲公司就邀請鄭子誠和梁健平去到上海拍廣告，重現經典。
梁建平、鄭子誠一齊被邀到上海拍手遊廣告，重現《讀心神探》造型。
鄭子誠的「奸樣」加上這句「抱歉，有錢是真的能為所欲為的」的截圖，簡直風靡網絡世界。網上更加有解釋這張截圖的正確用法，包括：當看到有錢的個人或組織為所欲為時、當看到有錢任性的言論或行為時，同官方推出的破壞遊戲平衡的新角色或卡牌等，相當趣怪。
鄭子誠其實憑靚聲及演繹奸角出神入化而一直備受香港網民欣賞，但這次紅到內地，連鄭子誠都說意想不到，他接受訪問時，說：「今次系完全冇預計到，會突然之間唔知點解會喺內地紅起上嚟，甚至乎我一直都不知情，直至到好幾個月之前，有一次我喺街上面拍緊外景，咁突然間有一對內地嘅朋友旅行，話想同我影相，咁我都幾驚訝，『點解你會識得我嘅呢？』咁佢就同我講『你知唔知你嘅表情包喺內地好紅呀？有錢就可以為所欲為呀，呢一句說話。』咁我先開始慢慢去睇返，究竟咩事情發生。首先知道7年前《讀心神探》呢套劇裡面，其中一場戲嘅其中一句說話就係『有錢可以為所欲為』，突然之間唔知點解會喺內地紅起上嚟，就好多人都用呢一個嘅表情包。咁今次返上海，其實就係幫內地一個頗大嘅手遊（手機遊戲）公司，就食住我同健平（梁健平）嘅呢條片，就同佢一齊拍廣告嘅。咁至於內地嘅影迷熱唔熱情呢，其實我就唔系太知喇，今次拍攝嘅過程都幾緊湊，我的一落機就做採訪，跟著就第日已經要開工，一拍拍成日，拍完之後就走喇。咁所以我基本上全部都喺室內進行，好少接觸到外邊嘅人，至於會唔會返內地發展，呢個就完全唔系我的控制得到嘅事嚟嘅，咁嘛暫時就冇呢個計劃啦，因為我的做演員永遠都系被動嘅東西嚟嘅，但繫有機會開拓自己，喺內地嘅一啲知名度同埋時常呢，都系一件好事嚟嘅，不過最重要嘅一樣野，就係我要好積極地要學習返嗰啲普通話喇，因為我啲普通話真系非常之普通嘅。」
閱讀更多 有火VIVA 的文章
