羅偉鵬、李勁鷹、羅小軍、國樑/文
舊時，南寧人食嘅嘢母多，而家想起身，有幾樣嘢印象仲繫好深嘅，比如講：炮米花、揼叮糖、雞蛋餅、玻珠糖、鼻鍋屎等，差母多就係阿幾樣。
其實，仲有一樣嘢，大家一定都飲過，而且大多數屋企都做過，講出嚟你哋肯定都有印象，阿樣嘢就係當時全南寧都興做嘅飲料——紅茶菌。如果講得母錯嘅話，紅茶菌系南寧頭一批保健養生飲料。
紅茶菌到底系咩嘢？你問而家嘅年輕人，佢哋肯定個個都矇喳喳。但系從40後到60後嘅“老嘢”，一定都清清楚楚。
記得繫上個世紀80年代初，紅茶菌開始從日本傳過嚟，傳到南寧母幾耐，南寧人好似發痴咁，家家戶戶都做紅茶菌。浸紅茶菌阿種玻璃盎，就係平時醃檸檬、酸梅哋種盎。
紅茶菌又喊做“海寶”、“胃寶”，系使糖、紅茶、水再加菌種經過浸泡發酵後做成嘅，阿只樣好似浸住一隻大海蜇咁，一般浸夠一個星期左右就可以飲賴。功效母錯，可以活血養胃、調節血壓、改善睡眠等。
有一次我哋同學聚會系外底食飯，飲得差不多有哋撈咩吤時候，有個同學無意中撩起話題傾起紅茶菌，一下子個個都興合合，你一句，我一句——
班花阿芬講：“紅茶菌酸酸甜甜，確實好飲。擼陣時去同學屋企耍，邊個屋都睇見有一兩瓶咁嘅嘢，而且大多數都放系客廳。”
南國街“一枝花”衛紅講：“我又見好飲捏！阿陣時聽大人講，飲阿只嘢對身體真繫好好嘅。以前兄弟姐妹多，浸幾多紅茶菌都母夠飲，所以我經常趁我老豆老乸母系屋嘅時候，偷偷筆幾殼出嚟飲。”
留級生阿施講：“痴嘿，我睇見都母想飲賴！望起身就好似醫院裡底使福爾馬林浸住器官阿種瓶，飲起身似督尿咁，酸酸餿餿，母識幾嘿肉酸。”
其實，而家我哋至識得，紅茶菌原身就母系日本人發明嘅，先系起源我哋渤海一帶，後嚟挨人帶到前蘇聯，再系高加索一帶培養應用。到賴1953年，日本嘅一個俄文女老師從高加索帶返日本培養，然後再又從日本流傳到世界各地。
