讲到2018农历新年，又点少得花车巡游！年初一睇完香港花车未够喉，就要年初三(2月18日)或者年初九(2月24日)过澳门走一转啦。因为今年澳门邀请咗嚟自法国、葡萄牙、德国、俄罗斯、西班牙、日本等世界各地嘅花车齐齐嚟表演，当然唔少得我哋香港同澳门嘅代表啦！巡游队伍会同大家一齐行大运、拜个年，两日都会沿途派发纪念品㗎！
澳门唔少地方已经有新春布置，充满新年气氛，系时候去一转影相打卡行大运啦！
今次活动主题会以灵犬旺财送福队为主角，将过去12年收集到嘅福气、健康同财富，带到畀在场嘅每位旅客，而且沿途仲会派礼物畀大家㗎！
今年巡游路线增设咗有盖座位俾游人，咁一家大细都可以舒舒服服坐低欣赏啦~
巡游沿途仲有好多文艺表演队伍，够晒气氛！
旺财招福 展开好运新一年
澳门贺年重头戏「华丽盛宴旺财年狗年花车巡游汇演」将会喺(2月18日)同年初九(2月24日)举行！汇演当日大家可以沿途欣赏到花车巡游之外，仲有表演队伍巡游、舞台文艺表演同烟花汇演添！初三当晚嘅起步仪式将会喺晚上8点旅游塔前嘅西湾湖广场举行，15部设计别出心裁嘅花车仲会联同超过1,000位分别来自8个国家同地区嘅表演队伍，其中包括9支外队同25支澳门表演队，一齐参与呢次盛事。而表演队伍亦会分成两批，无论你想留喺西湾湖广场睇表演、抑或同花车队一齐由孙逸仙大马路到澳门科学馆，都一样咁精彩！而初九晚嘅花车巡游，将会喺晚上8点于沙梨头北街举行起步仪式，15部花车会巡游到终点佑汉街市公园，薜家燕同一众港澳艺人歌手仲会参与压轴文艺表演添。今次主办单位仲好贴心，沿途增设2,300几个座位，观众席仲有帐蓬上盖，市民同旅客就可以安坐现场欣赏节目啦！
除咗花车巡游，年初三嘅烟花汇演亦系重点之一，记得准时到达啦~
跟住巡游睇烟花
同巡游队伍一齐睇完花车表演之后，当晚9点45分就可以嚟到澳门旅游塔外面，同屋企人一齐睇埋烟花先至走啦~今年有关单位特别用咗狗年同2018嚟做主题，已经谂到烟花设计一定好生动，超期待呀～加埋围绕四周嘅璀璨灯光，要影靓相就梗系唔可以错过呢个moment啦～澳门政府仲批出咗旅游塔附近位置可以畀大家玩吓烟火放吓炮竹，未试过嘅朋友系时候感受吓咩叫新年气氛!
大金龙及醒狮巡游都吸引到大批途中欣赏，为新一年带来好运。
仲有好得意小朋友参与表演，祝大家新年快乐！
閱讀更多 行者八戒 的文章
