内地出生的港姐冠军朱晨丽花了8年时间踏上一线花旦之列，但风光背后经历过不少苦楚！
朱晨丽10岁离开家乡学习芭蕾舞，16岁时获香港演艺学院取录入读舞蹈学院，及后更到美国深造，毕业后获香港芭蕾舞团赏识成为一员，故自小养成独立性格，但长时间独处下变得缺乏自信，即使长大参选港姐后入行，面对不同的人和事，仍未能解开心中「那把锁」。
回忆人生的低潮期，朱朱起初表现腼覥，后来才肯娓娓道来：「最差试过半年冇开工，都唔只一次添！当时唔好意思问公司，咪问吓经理人有冇工作，点知对方话：『你都未准备好，广东话又唔正，啲公司唔锺意用你，观众未接受你！』听到嗰刻系好唔开心……」
既然被狠批得体无完肤，朱朱只能败走而回，返家思前想后，决定增值自己：「当时我咁得闲，走去学功夫、跳舞，上唔同课程，当然系有赞助嘅。（唔去上广东话班？）冇钱！又冇咩人同我讲嘢，惟有打电话搵几个香港朋友不停讲，佢哋会纠正我，同埋我又会读报纸。我好惊同出面人讲嘢，人哋听唔明会笑我，呢样嘢到依家都摆脱唔到。」
身为父母掌上明珠，出来社会工作却变得一文不值，面对如此大打击，向来报喜不报忧的朱朱，每次致电双亲也只谈开心事，不敢提及收入问题。问到如何应付开支？她即悭妹上身：「我有底薪嘅，但每个月都系仅仅够，好在细个习惯储钱，唔会乱买嘢，我又唔出街，横掂观众未接受我，我都需要时间磨练。（冇谂过放弃？）从来冇！每个阶段都要经历。」结果皇天不负有心人，朱朱咬紧牙关捱到接拍《超时空男臣》，攞奖之余事业亦有起色，获公司力捧剧接剧，顺利攀上花旦之列，五年前更成功上车买楼，她坦言是捱苦多年得来的成果：「以前住过东涌、红磡，就连港岛劏房都住过，总之边度平就搬去，一分一毫都要度过先使。」
事业得意，感情又如何？朱朱与何广沛的绯闻虽甚嚣尘上，但她不肯透露半点，只表示感情状况不错：「冇得话渴唔渴望，但会谂吓自己结婚有小朋友又点……好多嘢可遇不可求，要对的时间遇上对的人。（以前试过对的人？）有闪过一下，唔系身份问题，系夹唔夹！每次拍拖都想系终身对象，不过当有呢个目标，就发现有唔同嘢出现。」
生长于传统家庭的她，坦言未能接受闪婚，认为最少要了解对方，但同居试婚却一试无妨：「结婚后都系住埋一齐，但我冇试过！（几耐冇拍拖？）呢个问题好尴尬！梗系想日日对住个对象，我拍拖都可以好Sweet，希望黐实对方，唔黐实会怀疑，依家冇拍拖喎！随缘啦！其实我唔使人养我，首要对方孝顺父母，有钱唔孝顺一定唔得，就算冇钱，至少肯为事业打拚，要有上进心，呢啲男仔实加分。」
閱讀更多 娛樂研究中心 的文章
