上周中的一天晚上，娄指导正在安静地看书，家里领导说有事跟我聊。
领导：哎，我有个朋友，想请教侬，啥地方好看到美国大学橄榄球比赛？
娄指导：啥？伊要看啥个比赛？美国大学橄榄球？麻烦侬转告伊，直接买张机票，飞到美国去看。看好嘛就蹲了美国覅回来，下个礼拜继续再看……
领导怒：侬只赤佬！人家诚心诚意来问侬呀。伊拉囡儿现在蹲了美国读大学，圣母大学侬晓得伐啦？（娄指导傻笑：我哪能会弗晓得，天主教大学，名气老响啊，橄榄球、篮球、冰球侪蛮好啊。橄榄球是最好啊。）
领导：是呀，伊帮我讲就是拨伊拉囡儿带过去啊呀。小姑娘跟牢美国同学一道去看校队主场比赛，乃么老娘也吵了要看。侬晓得上海看得着伐啦？
娄指导无奈：哦哟，太太唉，美国大学橄榄球我到啥地方去帮伊寻啦？全世界也只有美国国内电视台转播，美国人是看得起劲啊，像神经病样个。
领导：啊？美国人弗是只看NFL啊吗？大学橄榄球也有介许多人看啊？
娄指导：当然咯。侬晓得伐，美国人是迭能呃，橄榄球赛季开始以后，每个礼拜天全部是NFL职业比赛，礼拜六就侪是大学比赛。像NFL一样，大学强队个比赛基本侪有电视转播。我记得伊拉圣母大学主场比赛就是NBC转播个，从1991年开始，一直到现在。
领导惊讶：啊？介结棍啊？个么电视台要出钞票买转播权伐啦？
娄指导：当然。侬等一歇，我查一查。喏，侬看，1991年NBC第一趟问圣母大学购买主场比赛转播权，5年3800万美元。现在最新个转播权价钿，迭个是2013年4月份个新闻：NBC宣布，与圣母大学续约10年，每年至少7场。一年1500万美元，10年嘛，就是1.5亿美元。
领导：啊？钞票介好赚啊？每年7场主场比赛，1500万美元，一场比赛就好赚200万美元转播费？学堂发财了……（娄指导：呵呵，迭个200万美元伊拉只好拿一半，另外一半是分拨客队啊。）
领导：个么收视率哪能呢？
娄指导：我再来查……喏，侬看迭个是今年美国大学橄榄球转播收视率前十名。第一名，9月2日赛季揭幕战，佛罗里达州立大学对亚拉巴马大学，现场观众76330人，ABC直播收视率6.9，收视观众1234万人。伊拉圣母大学也有一场比赛收视率进前十名，并列第八，11月11日夜里客场对迈阿密大学，现场观众65326人，ABC直播收视率是3.9，收视观众673万人。
领导：照侬迭能讲法，美国人民礼拜六就侪跑到球场里厢去了咯？
娄指导：哈哈哈，差勿多。而且侬要晓得NFL只有32支球队呀，大学橄榄球队有多多少少？礼拜六一天弄个几十场比赛根本就是闭了眼睛随便白相个。美国最大个几只体育场，10万人以上个，基本侪是大学橄榄球队主场，只要有比赛就是10万人坐满。其他啥个8万人个球场就更加弗谈了。
领导：侬好刹车了，一讲起来就呒没底了。哎，我哪能去回复人家啦？
娄指导：呵呵，伊么就是爱屋及乌，因为囡儿看了所以也要轧闹猛。但是，上海实在呒没地方好看我哪能办啦？还是叫伊下趟到美国去看伐……
閱讀更多 東方體育日報 的文章
