千呼萬喚始出來。本週，中國足協有關廣州恆大外援阿蘭在比賽中肘擊對手的處罰決定終於出臺：停賽8場，罰款56000元。消息一出，立馬有友人來電，一定要跟我吐槽一下。
友人：婁兄啊，阿拉額足協真會得做事體啊……3月30日額比賽出額事體，拖啊拖啊，拖到4月10日再摜出來處罰決定，啥意思啦？
我：呵呵，迭額叫慎重（shenzhong），儂懂伐啦？
友人：屁！慎重？啥地方？儂足協要麼停阿蘭80場，我倒是還買賬儂慎重了！去年阿拉上海申花額秦升，還有上港額奧斯卡出事體額辰光伊拉捺能勿慎重呢？還勿是處罰決定出了個快？下手麼來得額重，拎起來就是半年，掉過頭就是8場……
我：嗯，還有北京國安額張稀哲來，停賽12場，從去年停到今年……
友人：是額呀！我北京幾個朋友儕了罵足協勿是麼事，判起其他球隊嘛狠三狠四，一看到廣州恆大一點聲音也嘸沒了……
我：唉，算了，要體諒中國足協，人家也作孽來西啊。廣州恆大幫忙足協解決了裡皮，解決了國家隊教練組，儂講講看足協能夠捺能？拖了介長辰光還是決定停賽8場，我覺著足協蠻勿容易個。嘸沒辦法呀，啥人叫足協窮呢？
友人：呸！啥麼事勿容易？要判，就要判了公平合理！噢，解決裡皮國家隊教練班子就算有功啦？儂堂堂中國足協連得“吃人家嘴軟，拿人家手短”個道理也勿懂？再講了，當初儂足協去求人家做裡皮個工作個辰光，捺能勿回報條件先想好啦？比如講，儂廣州恆大承擔裡皮團隊的薪水，我足協尋國家要政策幫儂免稅。
我：喂，朋友，理想歸理想，實際操作勿一樣呃好伐？儂講講便當，幫恆大免稅，儂以為足協搞得定？可能性幾乎為零！再講回來，就算真個搞定免稅，儂以為今朝迭張罰單就勿會拖辰光了？照樣要拖呃……兄弟啊，中國人人情社會呀，大家儕要面子撥來撥去啊……
友人：阿拉勿是擔心儂足協拖辰光，主要是覺著勿公平呀，一碗水總要端端平伐？
我：哈哈哈，老兄啊，拖辰光說明啥？說明足協內部壓力大呀，通路子打招呼甚至於拍臺子肯定儕有呃！我估計呢，追加處罰肯定是大家儕同意呃，主要就是停賽幾場吵勿清爽。儂老兄去年個案例翻出來，我只好講“此一時彼一時也，怎可同日而語”！
友人：格麼儂意思就是一碗水肯定端勿平了咯？
我：哈哈哈，要麼儂去當足協主席？
閱讀更多 東方體育日報 的文章
